«Қайырымдылық керуені» жеңімпазы Борис Щербаков: «Басты мақсат -табиғатты қорғау»

Нұрсұлтан Назарбаев Қорының «Қайырымдылық керуені» жобасындағы жеңімпаздардың бірі Борис Щербаковтың қызметі ешкімді бейжәй қалдырмасы анық. Ол Шығыс Қазақстан табиғатын дәріптеуге және оны сақтауға үлкен үлес қосқан ел азаматы.
Өскемен қаласының Құрметті азаматы Борис Васильевич белгілі жазушы, зоолог-ғалым. Жас натуралистер станциясында (экобиоцентр) 40 жылға жуық еңбек етті, оқушылардың бірнеше ұрпағын тәрбиеледі, олардың көпшілігі педагог, ғылым докторы атанды.
Шығыс Қазақстанда құстардың 25 түрін ашты, 350-ге жуық ғылыми мақала жариялады, ботаника, фаунистика, экология бойынша 35 кітап шығарды.
Жоба жеңімпазының бастамасымен Батыс-Алтай және Марқакөл қорықтары, Құлжа және Тарбағатай қорықтары құрылды, Тарханка және Риддер аудандарында ағаш кесу тоқтатылды.
Сондай-ақ Борис Щербаков Чечек шатқалында «Мектеп экологиялық қорығын» ұйымдастырып, жас натуралистерге далалық экология практикасынан өтуге және ғылыми ізденістер өткізуге мүмкіндік жасады.
- Мен кішкентай кезімнен натуралиспін. Көпжылдық жұмысымның басты мақсаты – табиғатты сақтау және адамдардың қоршаған ортаға ұқыпты қарауын қамтамасыз ету, - дейді Борис Щербаков.