«Самрұқ» Кореяны бағындырды: қазақстандық театрдың халықаралық фестивальдегі жеңісі

«Самрұқ» заманауи би театрының ұжымы Оңтүстік Кореяның Андон қаласында өткен Маскадағы халықаралық би фестивалінде (Andong International Mask Dance Festival) жоғары марапат иеленді. Бұл сапар Нұрсұлтан Назарбаев Қорының тревел-грантының қолдауымен жүзеге асты.

Андон фестивалі – Азия құрлығындағы ең ірі мәдени іс-шаралардың бірі. Бұл фестиваль жыл сайын әлемнің жиырмадан астам елінен келген би және театр ұжымдарының басын қосады. Биылғы іс-шараға жүздеген өнерпаз қатысып, әр халықтың би дәстүрі мен сахналық ерекшелігін паш етті.

Солардың ішінде қазақстандық «Самрұқ» театрының өнері ерекше көзге түсіп, көрермендердің ыстық ықыласына бөленді. Ұжым жеке орындау аталымында бірінші орын, ал топтық қойылымда Бас жүлде жеңіп алды. Сондай-ақ, театр артистеріне жеке нөмір үшін 800 000 вон, ал топтық би үшін 7 000 000 вон көлемінде қаржылай сыйақы табысталды.

Фестивальге қатысу ұжым үшін кәсіби жеңіс қана емес, сонымен бірге мәдениеттер үндестігінде баға жетпес тәжірибе болды. Қазақстандық бишілер заманауи хореографияны ұлттық мінезбен, музыкалық ырғақпен шебер ұштастырып, сан түрлі елден келген көрерменге ерекше әсер сыйлады.

Қазақстанда қазіргі заманғы би өнері әлі де қалыптасып келе жатқан жас бағыттардың бірі. Сол себепті «Самрұқ» сияқты кәсіби әрі креативті ұжымдарды қолдау – отандық өнердің дамуы үшін аса маңызды. Театр құрамында заманауи би (contemporary dance) бағытында кәсіби білім алған жас хореографтар мен талантты орындаушылар еңбек етеді.

Соңғы жылдары ұжым бірнеше авторлық жобаны сахнаға шығарды. Солардың ішінде «Қозғалыстағы Шопен» спектаклін көрермен мен сыншылар жылы қабылдап, оң пікір қалдырды.

— Қорға көрсеткен қолдауы мен сенімі үшін шын жүректен алғыс білдіреміз! Дәл осы көмектің арқасында біздің театр әлемнің түкпір-түкпірінен жиналған үздік ұжымдармен бір сахнада өнер көрсету мүмкіндігіне ие болды. Мұндай ауқымды іс-шарада Қазақстанды таныстыру – зор мәртебе әрі үлкен жауапкершілік. Заманауи би арқылы көрерменге шабыт сыйлау біз үшін үлкен бақыт!» – дейді труппа мүшелері.

«Самрұқ» театрының бұл жеңісі – гранттық қолдаудың өнерді өсіріп, елдің рухани келбетін байытып, жас өнерпаздарға сенім ұялататынын дәлелдейді.