«Qolqanat» қайырымдылық бастамасы: мұқтаж жандарға көмек

Нұрсұлтан Назарбаев Қоры мен «Madeni Qazyna Qory» қоғамдық қоры әлеуметтік тұрғыдан осал топтарға бағытталған «Qolqanat» («Елбасы жылуы») атты ауқымды қайырымдылық бастамасын жүзеге асырды. Бастаманың мақсаты – мұқтаж жандарға атаулы көмек көрсету.

Игі жоба аясында Алматы, Түркістан, Қызылорда, Жетісу, Абай, Ұлытау және Жамбыл облыстарында тұратын 900 отбасы қажетті азық-түлік және тұрмыстық жиынтық алды. Көмек көрсетілгендердің арасында көпбалалы отбасылар, жалғызбасты аналар, мүмкіндігі шектеулі балалар тәрбиелеп отырған жанұялар, ерекше қажеттілігі бар азаматтар, зейнеткерлер мен жалғызбасты қарттар секілді қамқорлықты қажет ететін қоғам өкілдері бар.

Әрбір жинақ белгілі бір мерзімге жеткілікті болатындай, күнделікті өмірге аса қажет тауарлардан жасақталды. Оның ішінде макарон өнімдері, ұн, қант, жарма түрлері, ет консервілері, көкөністер, шай мен тәттілер секілді азық-түлікпен қатар, иіс сабын, тіс пастасы, кір жуу ұнтағы, сусабын және ыдыс жуатын құрал сияқты тұрмыстық өнімдер бар. 

Көмек алушылар тізімі серіктес қайырымдылық қорларымен және жергілікті әлеуметтік қызметтермен бірлесе жасалды. Әр отбасы тізімге нақты құжаттармен расталған мұқтаждық негізінде енгізілді: табыс деңгейі, мүгедектік мәртебесі, жұмыссыздық, созылмалы аурулардың болуы және басқа да әлеуметтік жағдайлар ескерілді.

Бастама аясында арнайы топ күн сайын таңнан кешке дейін азық-түлік тасыды. Күніне шамамен 50 отбасына көмек жеткізілді.