«Бейбітшілікке қадам» жобасы: Алматы мектептерінде құрмет пен өзара түсіністік мәдениеті қалай қалыптасып келеді
Бүгін сіздерге Әлеуметтік идеялар мен жобалар жәрмеңкесінің жеңімпазы атанып, Қор қолдауына ие болған «Бейбітшілікке қадам: мектеп медиациясы іс жүзінде» жобасын ұсынамыз.
«Адам және құқық» медиаторлар мен заңгерлер одағы» республикалық қоғамдық бірлестігі жүзеге асырған бұл жоба білім беру кеңістігінде жанжалды бейбіт жолмен шешу мәдениетін қалыптастыруға және мектеп медиаторларын даярлауға бағытталған. Жобаның өзегі қарапайым, бірақ терең мағынаға ие: жанжал – тығырық емес, керісінше, өзара түсіністікке бастайтын диалог алаңы.
Алматының сегіз ауданындағы сегіз мектепте іске асқан жоба уақыт өте келе тиімді жүйеге айналды. Ересектер мен жасөспірімдер бір-бірін тыңдауға, түсінуге және ортақ шешім табуға дағдылана бастады. Мектеп психологтары мен тәрбие ісі жөніндегі директор орынбасарлары медиацияны тек теория емес, күнделікті өмірде қолданылатын маңызды құрал ретінде меңгерді. Ал оқушылар мектеп медиаторы рөлін тәжірибе жүзінде игеріп, жаңа әлеуметтік жауапкершілікті сезінді. Соның нәтижесінде білім беру ұйымдарында татуласу орталықтары құрылып, жанжалды басып-жаншу емес, саналы түрде талқылап, шешім табу мәдениеті қалыптасты.
Жобаның қорытындысы 14 сәуір күні Алматы гуманитарлық-экономикалық университеті базасында өткен «Заң мен тәртіп — қоғамның негізі» форумында таныстырылды. Іс-шараға мемлекеттік органдар өкілдері, сарапшылар, медиаторлар мен педагогтармен қоса 150-ге жуық адам қатысты. Форум барысында қатысушылар мектеп медиациясы тек бір реттік бастама емес, құқықтық мәдениет қалыптастыратын және жанжалдың алдын алуға мүмкіндік беретін тиімді тетік деген ортақ пікірге келді.
«Бейбітшілікке қадам» жобасы мектеп қабырғасынан бастап өзара құрмет пен ашық диалог мәдениетін қалыптастырудың маңызын айқын көрсетті. Себебі дәл осы дағдылар жасөспірімдердің жанжалдан гөрі келісімді таңдайтын қауіпсіз ортада қалыптасуына негіз болады.
