Жезқазғанда нейро-ортопедиялық ауытқулары бар балаларға арналған алғашқы мемлекеттік оңалту орталығы ашылды
11 қараша күні Жезқазғанда нейро-ортопедиялық ауытқулары бар балаларға арналған өңірдегі алғашқы «QH» мемлекеттік оңалту орталығы салтанатты түрде ашылды. Ашылу рәсіміне облыс әкімі Дастан Рысбеков, «Қазақстан халқына» қорының Басқарма төрағасы Болат Жәмішев, Нұрсұлтан Назарбаев Қорының атқарушы директорының орынбасары Әлкей Марғұланұлы және «Қазақмыс корпорациясы» ЖШС тұрақты даму жөніндегі департамент басшысы Медет Шәріпханұлы Дүйсембаев қатысты.
Жаңа орталық 3 жастан 18 жасқа дейінгі балаларға арналған және жылына 600 баланы қабылдай алады, бұл аймақта кешенді оңалту көмегін қамтамасыз етеді. «QH» орталығы «Қарлығаш» шипажайы базасында орналасқан. Ұлытау облысы әкімдігінің қолдауымен мұнда жөндеу жұмыстары жүргізіліп, кішкентай науқастар үшін қолайлы жағдай жасалды.
Көмек көрсетудің жоғары деңгейін сақтау мақсатында орталықта мультидисциплинарлы команда құрылды: оған невропатолог дәрігерлер, реабилитологтар, логопедтер, ЕДШ нұсқаушылары, дефектологтар, еңбек терапевттері, психологтар кіреді. Мамандардың дайындықтан өтуі бірнеше кезеңнен тұрады, оған шетелдік тәлімгерлер тартылады. Мамандар Нұрсұлтан Назарбаев Қорының қолдауымен дайындалады.
«Қамқорлық» орталықтары заманауи медициналық оңалту жабдықтарымен қамтамасыз етілген, олар әлемдік брендтердің жоғары сапалы құралдарымен жабдықталған. Орталықтың жабдықталуына жобаның бас серіктесі – «Қазақстан халқына» қоры қаржылай қолдау көрсетті.
«Біз сапалы оңалтудың Қазақстанның барлық өңіріндегі балаларға қолжетімді болғанына қуаныштымыз. Бүгін «Қазақстан халқына» қорымен бірлескен «QH Оңалту орталықтары» жобасы аясындағы алғашқы орталықты аштық. 2025 жылдың соңына дейін тағы 5 осындай оңалту орталығын Жетісу, Қарағанды, Павлодар, Солтүстік Қазақстан облыстарында және Шымкент қаласында ашу жоспарланып отыр. Бұл бізге көмекке мұқтаж және қолдауға мұқтаж балаларды қамтуға мүмкіндік береді», - деді «Қамқорлық Қоры» Корпоративтік қорының директоры Арайлым Еркінова.
Орталық мемлекеттік оңалту мекемелерінің желісіне кіреді, бұл міндетті әлеуметтік медициналық сақтандыру жүйесі аясында тегін қызмет көрсетуге мүмкіндік береді.
