Астанада алғаш рет мектеп оқушылары мен студенттер арасында «Museum Cup 2026» пікірсайыс турнирі өтеді

Елордада алғаш рет қазақ тілінде өтетін «Museum Cup 2026» пікірсайыс турнирі ұйымдастырылады. Зияткерлік сайыс мектеп оқушылары мен колледж студенттерін ерекше алаң — музейде біріктіреді. Ұйымдастырушылардың айтуынша, мұндай формат жастардың интеллектуалдық дамуын мәдени-тарихи ортамен ұштастыруды бағытталған.

Турнирдің бастамашылары — «Debat Eli» қоғамдық қоры мен Қазақстан Республикасының Тұңғыш Президенті музейі. Бұл пікірсайыс алаңы ретінде дәстүрлі оқу орны емес, тарих пен мәдениеттің тоғысқан ордасы — музей таңдалған алғашқы жоба. 

Мұндай тәсіл іс-шараға терең мазмұн мен айрықша рухани сипат беріп, оның тәрбиелік әрі танымдық маңызын арттыра түседі.

«Museum Cup 2026» турнирінің басты мақсаты — жастардың пікірсайыс мәдениетін қалыптастырып, сыни ойлау қабілетін жетілдіру және шешендік өнерін дамыту. Сонымен қатар, жоба азаматтық қоғам құндылықтарын дәріптеуге, отансүйгіштік сезімді нығайтуға және жас буынның зияткерлік әлеуетін арттыруға бағытталған.

Іс-шара аясында мәдени-тарихи мазмұнға ерекше мән беріледі. Пікірталас арқылы ұлттық жадыны жаңғырту, тарихи мұраны жаңаша пайымдау көзделген.

Турнирге Астана қаласынан 60-қа жуық белсенді әрі білімді мектеп оқушысы мен колледж студенті қатысады деп жоспарланып отыр. 

Іс-шара 2026 жылы 26 сәуір күні сағат 09:30-да Астана қаласы, Әлихан Бөкейхан көшесі, 1 мекенжайында өтеді.

Турнир бағдарламасымен мына сілтеме арқылы танысуға болады.

Қосымша ақпаратты мына телефон нөмірі арқылы алуға болады: 8 775 382 8241 (Жанерке).