Басин оқулары – жаңа буын заңгерлері қалыптасатын ғылыми орта
Каспий қоғамдық университетінде дәстүрлі Басин оқулары аясында «Жеке құқықтың өзекті мәселелері» тақырыбында студенттер мен жас ғалымдардың халықаралық ғылыми-тәжірибелік конференциясы өтті. Іс-шараны университет пен Нұрсұлтан Назарбаев Қоры бірлесіп ұйымдастырды.
Конференция қазақстандық цивилистика ғылымының негізін қалаушылардың бірі Юрий Григорьевич Басиннің құрметіне арналды. Бұл ғалымды еске алу ғана емес, сонымен қатар оның ғылыми мұрасын жас зерттеушілердің еңбегі арқылы жалғастыруға бағытталған маңызды бастама. Биылғы жиынға Қазақстан, Ресей, Қырғызстан және Тәжікстаннан келген студенттер, магистранттар мен жас ғалымдар қатысты.
Форум барысында азаматтық, отбасылық, халықаралық жеке және корпоративтік құқық мәселесімен қатар, цифрлық активтер, жасанды интеллект, дербес деректерді қорғау, шарттық қатынастардың өзгеруі секілді заманауи тақырыптар кеңінен талқыланды. Яғни, қазіргі таңда құқық енді ғана қалыптасып жатқан жас зерттеушілердің көзқарасы ерекше маңызды саналатын бағыттарға басымдық берілді.
Конференция барысында Қор жанындағы Ғылым жөніндегі кеңес төрағасының атынан Философия, саясаттану және дінтану институты бас директорының стратегиялық даму жөніндегі орынбасары Ермек Тоқтаровтың құттықтау хаты оқылды. Онда Қор мен университет арасындағы серіктестіктің жүйелі әрі ұзақмерзімді сипатқа ие екені, сондай-ақ дәл осындай тұрақты ынтымақтастық шынайы ғылыми орта қалыптастыруға негіз болатыны атап өтілді.
Іс-шара аясында қатысушылар өз зерттеулерін таныстырып қана қоймай, азаматтық құқықты қорғаудан бастап цифрлық экономиканы құқықтық реттеуге дейінгі өзекті мәселелерді жан-жақты талқылады. «Үздік ғылыми баяндама» байқауының жеңімпаздары Қор атынан дипломдармен және естелік сыйлықтармен марапатталды. Сонымен қатар, ұсынылған ғылыми жұмыстарды жариялау жоспарланып отыр. Бұл зерттеулердің конференциямен шектелмей, ғылыми айналымда жалғасын табуына мүмкіндік береді.
Басин оқулары бүгінде жай ғана жыл сайынғы ғылыми жиын емес. Бұл жас заңгерлердің заманауи құқықтық кеңістікте ой-пікір білдіріп, институционалдық қолдауға ие болатын маңызды алаң.
