Астанада «Қазақ елі: дамудың тұжырымдамалық негіздері және жаһандық әлемге бейімделу» атты халықаралық форум өтті
Дүниежүзі қазақтарының І құрылтайының тарихы мен рөлін, қазақ халқының мәдени мұрасын сақтау мәселелерін және қазіргі заманғы сын-қатер жағдайында ұлтты ұйыстыруды талқылау – бұл «Қазақ елі: дамудың тұжырымдамалық негіздері және жаһандық әлемге бейімделу» халықаралық форумында талқыланды.
Дүниежүзі қазақтарының І құрылтайының 30 жылдығына арналған форумды Қазақстан Республикасының Тұңғыш Президенті – Елбасы Кітапханасы мен Нұрсұлтан Назарбаев Қоры ұйымдастырды.
Іс-шараға ҚР Ақпарат және қоғамдық даму, мәдениет және спорт, Сыртқы істер министрліктерінің, Қазақстанның дипломатиялық корпусының өкілдері, Парламент депутаттары, сонымен қатар, Әзірбайжан, Германия, Дания, Иран, Қырғызстан, Моңғолия, Ресей, Түркия, Франция, Өзбекстан мемлекет және қоғам қайраткерлері – қазақ диаспорасының өкілдері, ғалымдар мен мәдениет қайраткерлері қатысты.
Форумды ашқан кітапхана директоры Бақытжан Темірболат: «Бүгінгі іс-шараға онлайн және офлайн режимінде 12 елден келген қазақ диаспорасының өкілдері қатысуда. Осыдан 30 жыл бұрын Қазақстанның Тұңғыш Президенті Нұрсұлтан Назарбаевтың бастамасы бойынша дүниежүзіне таралған миллиондаған қазақ бауырларымыздың жүрегіне Отанмен қайта қауышуға үміт ұялатқан дүниежүзі қазақтарының бірінші құрылтайы өткізілді», - деп атап өтті.
«Дүниежүзі қазақтары қауымдастығының ақпараты бойынша, бүгінде Қазақстан аумағынан тыс әлемде 5 миллионнан астам отандасымыз тұрады. Бұл біздің еліміз үшін өте үлкен әлеует және үлкен мүмкіндіктер болуы мүмкін. Алайда елдің деңгейі мемлекеттің еңбектерімен, танымал адамдар мен ғалымдардың жетістіктерімен өлшенеді. Жүйелі мемлекеттік гуманитарлық, әлеуметтік саясат жүргізу маңызды. Бүгінгі форумда көптеген мәселе талқыланып, құнды ұсыныстар айтылады деп сенемін», - деді Нұрсұлтан Назарбаев Қорының атқарушы директорының орынбасары Әлкей Марғұланұлы.
«Біздің мемлекеттік тәуелсіздігіміз – ұлтымыздың, мемлекетіміздің іргетасы және еліміздің мызғымас шаңырағының кепілі. Біз осы қасиетті тұжырымдаманы, Қазақстанның Тұңғыш Президентінің осы іргетасты қалыптастырудағы рөлін сезінгенде және осы құндылықты құрметтейтін болсақ, онда біз мықты ұлт боламыз, әлемдік қоғамдастықтың белсенді мүшелері боламыз, өз құқығымызды әрдайым қорғай аламыз», - деп мемлекет және қоғам қайраткері Қуаныш Сұлтанов халықты біріктіретін құндылықтарды атады.
Форум жұмысы барысында кездесуге қатысушылар бүкіл әлем бойынша қазақтарды біріктіру, ел ішінде келісімді нығайту, ұлттық құндылықтарды насихаттау мақсатында бірқатар ұсыныс айтты. Осылайша, отанына оралғысы келетін қазақтарға азаматтық алу тәртібін оңайлату, Қазақстанда орналастыру үшін жаңа әлеуметтік мүмкіндіктер жасау, елден тыс жерлерде мәдени іс-шаралар өткізу және т.б. іс-шаралар ұсынылды.
Форумның маңызды бөлігі ҚР Тұңғыш Президенті - Елбасы кітапханасының қорынан жинақталған архив құжаттары мен кітаптарының көрмесі, дәстүрлі қазақ қолөнері мен ұлттық киім көрме-жәрмеңкесін өткізу болды. Қонақтарға Тұңғыш Президент Музейінің экспозициялары, сонымен бірге, Дүниежүзі қазақтары құрылтайының 30 жылдығына арналған «Қазақстан – менің Отаным» тақырыптық көрмесі ұсынылды.
Халықаралық форум жұмысының қорытындысы бойынша материалдардың электрондық жинағы шығарылады.
