Кейіпкер бейнесі, мазмұн мен еркіндік: Астанада қаламгер әйелдер жастармен жүздесті
Әдеби шығарма қалай туады? Кейіпкердің мінезі мен болмысы қандай жолмен қалыптасады? Қазіргі авторлар туындылары арқылы қандай құндылықтар мен идеяларды жеткізеді? Осы және өзге де өзекті мәселелер Назарбаев орталығында өткен жас қаламгер әйелдер мен жастардың кездесуінде кеңінен талқыланды.
Іс-шараны Tan Art Residency «Казахстанские страницы» кітап клубы және PR room қауымдастығының қолдауымен ұйымдастырды.
Кездесуге Дана Найдер, Томирис Адамбаева және көпшілікке сырын аша бермейтін Роу Райто қатысты. Соған қарамастан, ол оқырмандармен еркін пікір алмасуға дайын екенін білдірді.
Дана Найдер оқырман назарына «Ген превосходства» атты шығармасын таныстырды. Фантастикалық жанрдағы бұл роман билік, тұлғалық болмыс және адам таңдауының салмағы сынды терең ой қозғайды.
Томирис Адамбаева «Симфония праха» романы туралы баяндап, шығармада өлім мен адам жанын толғандыратын ішкі күйзелісті жеткізді. Оның шығармалары «Дактиль», Aina Stories және «Прочитано» басылымдарында жарық көрген.
Роу Райто «Маленький негодный дятел» дебюттік романы арқылы ішкі еркіндікке ұмтылған жандардың тағдырын суреттегенін айтты.
Жазушылар кейіпкерді көркемдік тұрғыда ашу, сюжетті өрбіту, шығармашылық ізденіс туралы ой бөлісіп, туындылардың жазылу тарихы мен оларды оқырманға ұсыну жолдары жайында әңгімеледі.
Бірнеше сағатқа жалғасқан кездесу шынайы, әсерлі әрі мазмұнды өтті. Қатысушылар көкейіндегі көптеген сауалға жауап алып, құнды ақпаратқа қанықты.
Кездесу соңында оқырмандар авторлардың қолтаңбасы қойылған кітаптарды сатып алу мүмкіндігіне ие болды.
Айта кету керек, Tan Art Residency – елдегі креативті индустрия өкілдерін бір арнаға тоғыстыратын алаң. Қауымдастық ұйымдастырған 13 іс-шара аясында көрмелер, кинокөрсетілімдер мен шебердің дәрісі өткізіліп, оларға жазушылармен қатар суретшілер, музыканттар және режиссерлер де қатысқан.
Қорыта айтқанда, Tan Art Residency жобалары талант иелеріне қолдау көрсетіп, олардың қоғаммен байланысын нығайтуға және шығармашылық әлеуетін дамытуға ықпал ететін маңызды мәдени кеңістік.
