«Елбасы Медалі» жобасына қатысушылар жастарға арнап мотивациялық бейнебаян дайындады

«Елбасы Медалі» бағдарламасына қатысушылар жобаны іске асыру кезінде өзін-өзі дамыту мен мақсатқа жетудегі табысты жанның үлгісін көрсете білді.

Нұрсұлтан Назарбаев Қоры жанындағы «Елбасы Академиясы» жүзеге асыратын жоба жастарды кешенді дамытуға бағытталған ұлттық деңгейдегі жалғыз бағдарлама саналады.

6-18 ай ішінде жоба қатысушылары спорт, дарын мен дағды, кітап оқу, ұлттық мұра, еріктілік, туристік саяхаттар, еңбек тәжірибесі сынды 7 бағыт бойынша тапсырмалар орындайды. Жобаның үздік қатысушылары жоғары оқу орындарында тегін оқуға мүмкіндік алады.

Жобаның белсенді елордалық қатысушылары «Елбасы Медалінің» көптеген бағыты мен құндылығын көрсететін «Бәрінен мықты» мотивациялық бейнебаянын дайындады. Ролик балаларды мақсат қоя білуге, өзіне сенімді әрі белсенді болуға, спортпен шұғылдануға үндейді. Жастар әннің сөзі мен әуенін жазып, биін де ойлап тапқан.

- Қазіргі таңда табысқа жету мен елдің дамуына үлес қосу үшін бейнебаянда көрсеткен талаптарға сәйкес болу керек. Бұл туынды – елдің болашағына негізделген құндылықтарды бейнелейтін біздің және мемлекет жетістігінің көрінісі. Сол себепті, шығармашылық жұмысымызды Қазақстан Тәуелсіздігінің 30 жылдығына арнадық, - дейді жоба қатысушылары.

Жоба басталғанға дейін қатысушылар қола, күміс немесе алтын деңгейді таңдап, 6 айдан 18 айға дейінгі бағдарламаны бастауы керек. Белгіленген бағыт бойынша тапсырманы орындап, қатысушылар апта сайын есепті сайтқа жүктейді, ал оны тәлімгер тексереді.

 «Елбасы Медалі» жобасына екі жылда еліміздің әр өңірінен 20 мыңнан астам адам қатысты. Екі жыл ішінде Елбасының 4120 қола және 8 күміс медалі табыс етілді. ҚР жоғары оқу орындарына білім гранттарын тағайындау кезінде медаль иегері артықшылыққа ие болады (ҰБТ балы тең болса, Елбасы Медалінің иесіне басымдық беріледі). Мысалы, 2021 жылы 605 медаль иесі білім грантын алды, оның 30%-дан астамы – ауыл мектебінің түлектері.